Meir robuste støtteordningar til næringsutvikling
NYSKAPING: Næringslivet i Vestland skal få meir robuste støtteordningar. Illustrasjonsfoto frå Florø av Morten Wanvik/Vestland fylkeskommune
– Vi ønsker å få meir robuste støtteordningar til nyskaping og næringsutvikling i Vestland, seier Tor André Ljosland, leiar av hovudutval for næring. To nye støtteordningar blir no lansert, der den enkelte aktør kan få inntil ein million kroner.
– Målet er å bidra til utvikling og nyskaping av berekraftige arbeidsplassar og levande lokalsamfunn i heile fylket. Deltaking i arbeidslivet og gode lokalsamfunn er viktig for integrering i samfunnet og livskvalitet, seier Ljosland.
Frå 2024 til 2029
Den eine støtteordninga er for næringshagar og inkubatorar. Ei tilsvarande støtteordning er for andre aktørar innan innovasjon og næringsutvikling. Ordninga gjeld frå januar neste år. Den skal i første omgang gjelde over to periodar, begge på tre år, frå 2024 til 2029.
– Med støtteordninga skal vi inngå samarbeidsavtale med aktuelle aktørar over heile fylket. Aktørane skal bidra til å styrke grøn næringsutvikling, rett kompetanse, verdiskaping og berekraftige arbeidsplassar. Samarbeidsavtalane skal styrke aktørane over tid og mobilisere til aktiv jobbing mot regionale mål, seier Ljosland.
Ein million kroner
Den maksimale støtta ein aktør kan få, er ein million kroner. I tillegg skal aktøren bidra med 50 prosent eigendel.
– Med denne støtteordninga mobiliserer vi aktørar over heile fylket som bidrar med dei verkemidla og kompetansen dei rår over, og som supplerer og utfyller den verksemda som fylkeskommunen har. Mange utviklingsmiljø og næringsorganisasjonar har stor kompetanse og unik nærleik til næringsaktørar og ulike geografiske område. Dei er med på å tilpasse innsatsen for best mogeleg utnytting av felles ressursar, seier utvalsleiar Tor André Ljosland.
Godkjent opplegg
Hovudutval for næring har godkjent retningslinjer, rammer og opplegg for utlysing av støtteordninga. Søknadsfrist er 1. oktober.
